کابل ولایت د مرکزي توقیفخونې د پرسونل د فقهي زده کړو لومړۍ دوره پايته ورسېده

دغه دوره، چې څه موده وړاندې د نوموړې توقیفخونې د ملکي او نظامي پرسونل لپاره پیل شوې وه، نن(چهارشنبې) يې له برخوالو څخه د دې زده کړو د پوهېدنې د ارزونې په توګه پر ازموینې اخیستو پايته ورسېده.
د زندانونو چارو د سمون ادارې د ښوونې او بیا روزنې رئیس محترم مولوي عبدالوارث "سادات" په دې اړه جوړې شوې غونډې ته د وینا پرمهال، یاده ازموینه د پرسونل د هڅونې په موخه ارزښتمنه وبلله او د خوښۍ په څرګندولو سره يې وويل، چې نوموړي پرسونل په کې په ډېرې لېوالتیا ګډون کړی وو.
داراز، هغه ژمنه وکړه چې د دې پرسونل د دیني پوهې او کاري وړتیا لوړاوي لپاره به په راتلونکې کې نور ګټور پروګرامونه هم پلي کړي‎.
په ورته وخت کې، د ادارې د ارشاد او دعوت رئیس محترم مولوي صدیق الله "صدیقي" یادې غونډې ته په خپلو خبرو کې د دې توقیفخونې د پرسونل لپاره دیني زده کړې اړینې وبللې او ورته یې وويل: « دا ستاسو لپاره یو ښه فرصت دی، چې په کې ګډون سره به یې هم دنیوي او هم اخروي اجر ترلاسه کړئ». همداشان، د کابل ولایت د مرکزي توقیفخونې ملکي او نظامي پرسونل هم د فقهي زده کړو له روان بهیر څخه خوښي وښوده او د زندانونو چارو د سمون ادارې څخه یې د دغې بهیر د دوام غوښتنه وکړه.

ذوالحجه ۲۴/ ۱۴۴۴
د مقام د دفتر ریاست
د اطلاعاتو او عامه اړیکو امریت