ولایتي خبرونه (کندهار- بغلان) د کندهار ولایت په زندان کې د درې تنو زندانیانو د تېښتې مخه ونیول شوه
د دغه ولایت د زندان د مسوولینو په وینا، د نوموړي زندان درې تنو زندانیانو غوښتل چې په ډير مهارت او جوړشوي پلان له مخې له یاد زندان څخه پښې سپکې کړي، د دې زندان د زړورو ساتونکو له لورې یې مخه ډب او اړوندو برخو ته د لا نورو څېړنو لپاره وسپارل شول.
دغه راز، د یادو مسوولینو په وینا ، د کندهار ولایت د زندان یو تن ساتونکي چې د دې تېښتې مخه یې نیولې وه د نغدي جایزې او نورې همکاریو ترڅنګ نوروساتونکو ته هم پر زندانیانو د ښې پاملرنې او خوندي امنیت رامنځ ته کولو په موخه لارښوونې وشوې.
همداشان، د دې ولایت د زندان دوه تنه پایوازانو چې غوښتل یې یو اندازه نشه یي توکي (چرس) او یو میل قلم ډوله (تمانچه) ياد زندان ته ولېږدوي، د دغه زندان د بیدارو امنیتي او کشفي اورګانونو له خوا د کره تلاشۍ پرمهال کشف، ضبط او له لېږدونکو سره یو ځای یې د یوې دوسې په ترڅ کې رسماً اړوندو برخو ته د لا نورو څېړنو لپاره وسپارل شول.
د یوبل خبر له مخې، د بغلان ولایت د عدلي او قضایي اورګانونو یوه پلاوي تېره ورځ د نوموړي ولایت د زندان له مسوولینو سره د لیدنې ترڅنګ له زندانیانو سره هم له ليدلي د هغوی ستونزې او غوښتنې یې اورېدلي، چې زندانیانو د پلاوي په ورتګ خوښي څرګنده کړه او د خپلو جرمي دوسیو د ژر څېړلو غوښتنه يې ترې وکړه.
په ورته وخت کې، نوموړي پلاوي زندانیانو ته ډاډ ورکړ چې دوی به یې د جرمي دوسیو په برخه کې خپلو چارو ته لانوره هم چټکتیا ورکړي.
ذوالحجة الحرام ۱۹/ ۱۴۴۵
د مقام د دفتر ریاست
د اطلاعاتو او عامه اړیکو امریت
