د کابل ولایت د څرخي پله مرکزي محبس کې د نارینه محبوسینو د والیبال لوبډلو ترمنځ د نیمه پایلوبې سیالۍ ترسره شوې
دغه سیالۍ چې د زندانونو چارو د سمون ادارې د ښوونې او بیا روزنې ریاست له لورې او د افغانستان د المپیک ملي کمېټې په همکارۍ شاوخوا یوه میاشت وړاندې پیل شوې وې، تېره ورځ ناوخته یې د نیمه پایلوبې سیالۍ ترسره شوې.
د دغې ادارې د ښوونې او بیا روزنې رئیس محترم مولوي نظرمحمد "ناصري"، په دې اړه جوړو شویو مراسمو کې، چې د دې ادارې د بشري سرچینو رئیس محترم مولوي ضیاالرحمن"سعید"، د خدماتو رئیس محترم الحاج مولوي عبدالمالک "خاکسار"، له ولایتونو سره د اړیکو رئیس محترم مولوي عبدالفتاح "فاتح" او یو شمېر نورو مسوولینو او مینوالو محبوسینو شتون درلود په خپلو خبرو کې وویل، دا سیالۍ د څرخي پله مرکزي زندان د نارینه محبس د پینځه ګونو بلاکونو د والیبال د پینځو لوبډلو ترمنځ روانې وې، چې په ترڅ کې یې د پینځم بلاک لوبډلې خپلې ټولې لوبې وګټلې او پایلوبې ته ووتله.
هغه زیاتوي، چې تېره ورځ بیا د اووم او نهم بلاک د لوبډلو ترمنځ لوبه وشوه او د ۷ بلاک لوبډلې وکولی شول نهم شاته پرېږدي او پایلوبې ته ځان ورسوي.
د زندانونو چارو د سمون ادارې له خوا د دغو سیالیو موخه په زندانونو کې د زندانیانو لپاره د تفریح او سالمې فضا رامنځته کول، له خپګان، استرس او د وخت د بېځایه ضایع کېدو څخه مخنیوی او د روحي او جسمي روغتیا او سلامتیا خوندیتوب دی.
هېره دې نه وي، چې دمګړۍ یادې سیالۍ د هېواد د ۱۱ ولایتونو په زندانونو کې روانې دي او په راتلونکې کې به یې لړۍ نورو ولایتونو ته هم وغځېږي.
د یادولو ده، چې د مرکزي محبس د والیبان د اووم او پینځم بلاک د لوبډلو ترمنځ پایلوبه به راتلونکې یکشنبې ترسره شي.
ربیع الاول ۲/ ۱۴۴۶
د مقام د دفتر ریاست
د اطلاعاتو او عامه اړیکو امریت
