ولایتي خبرونه: (ننګرهار، میدان وردګ) د ننګرهار ولایت له ښځینه زندان څخه( ۴۱) تنه محبوسینې له دیني او حرفوي زده کړو له دورو څخه فارغې شوې
په دې اړه جوړو شویو مراسمو کې چې د یاد ولایت د زندان رئیس محترم مولوي سهیل "سعید" او یو شمېر نورو سیمه ییزو مسوولینو ګډون کړی و، د شرعي پردې تر شا د خبرو پرمهال د اسلامي حجاب پر ارزښت، اهمیت او ګټو سربېره وویل چې دلته په زندان کې درکړل شوې زده کړې به ستاسو د اصلاح سبب وګرځي.
داراز، محترم مولوي سعید زیاته کړله، چې دیني زده کړې د انسان د فکر او روح لپاره د لارښوونې څراغ دی او حرفوي زده کړې بیا د ژوند له مادي اړخه د سمون وسیله ده.
د یادونې ده، چې ننګرهار ښځینه محبس کې د ديني او حرفوي برنامو له لارې ( ۴۱) تنه محبوسینې فارغې شوې، چې له دې جملې څخه (۲۳) تنه د ناظرې او تجوید او (۱۸) تنه د خیاطۍ په برخه کې زده کړې بشپړې کړې دي.
د یو بل خبر له مخې، د میدان وردګ ولایت د زندان امر او مل پلاوي یې د دې ولایت د جلریز ولسوالۍ له توقیفخونې څخه ليدنه وکړله
د دغه ولایت د زندان امر محترم مولوي محمد هاشم "حقاني" او مل پلاوي یې تېره ورځ د نوموړي ولایت د جلریز ولسوالۍ له توقیفخونې څخه د لیدنې پرمهال د یادې توقیفخونې له مسوولینو سره په اړوندو مسایلو خبرې اترې وکړې.
همداشان، پلاوي د دې ولسوالۍ د توقیفخونې اداري او تخنیکي چارو ارزولو ترڅنګ، د چارو د لاښه والي په موخه اړوند مسوولینو ته د حل په موخه لازمې لارښوونې وکړې.
داراز، پلاوي د دغې ولسوالۍ د توقیفخونې له توقیفیانو سره ولیدل او هغوی هم له نوموړي پلاوي څخه د دوی د وضعیت او حال د ارزونې له کبله د مننې تر څنګ خپلې ستونزې او غوښتنې شرېکې کړې چې د پلاوي له لورې د هغوی دې غوښتنو ته د رسېدنې، د هغوی د حقونو رعایتولو او ورته د لازمو اسانتیاوو د برارولو ژمنه وشوه.
ربیع الاول ۱/ ۱۴۴۷
د مقام د دفتر ریاست
د اطلاعاتو او عامه اړیکو امریت
