د پوهنې وزارت او د زندانونو چارو د سمون ادارې ترمنځ د همکاریو هوکړه لیک لاسلیک شو
د زندانونو چارو د سمون ادارې د ښوونې او بیا روزنې ریاست او پوهنې وزارت د سواد زده کړو ریاست ترمنځ زندانیانو ته د لیک لوست زده کړو په موخه هوکړه لیک لاسلیک شو.
د دې ادارې د ښوونې او بیا روزنې رئیس محترم مولوي نظر محمد "ناصري" په دې اړه جوړو شویو مراسمو کې وویل؛ نوموړې اداره تل هڅه کوي چې زندانیانو د اصلاح په موخه ښوونیزې او روزنیزې برنامې لا پراخې کړي څو پر مټ یې زندانیان د بند مودې پوره کېدو سره سم خپلې کورنۍ او ټولنې ته د یو مثبت فکر سره د سالم وګړي په توګه یو ځای شي.
محترم مولوي ناصري زیاتوي، د نوموړې ادارې اړوند ټول زندانونه د علم او شخصیت جوړونې په مرکزونه بدل شوي او زندانیانو د اصلاح په موخه دیني، عصري او حرفوي زده کړو بهیر ورځ تر بلې پیاوړی کیږي.
همدا راز، د پوهنې وزارت د سواد زده کړو ریاست مسوولینو په وینا، د یاد هوکړه لیک تر لاسلیک کېدو سره سم به د هیواد په (۳۹) زندانونو کې (۲۳۹۱) زندانیانو ته د لیک لوست زده کړو زمینه برابره شي.
په پای کې، دواړو لوریو یاد هوکړه لیک اړین او ګټور وباله او د نوموړو ریاستونو ترمنځ د همکاریو د دوام ژمنه وشوه.
محرم الحرام ۱۸/ ۱۴۴۷
د مقام د دفتر ریاست
د اطلاعاتو او عامه اړیکو امریت
