د زندانونو چارو د سمون ادارې اړوندو مسوولينو د(VAN) موسسې له استازو سره ولیدل

د زندانونو چارو د سمون ادارې د مقام د دفتر رئیس محترم عبیدالله "اخلاص" نن(چهارشنبې) په داسې حال کې، چې د ادارې د بېلابېلو مرکزي برخو رئیسانو او مسوولينو هم شتون درلود، په خپل کاري دفتر کې د (وي اې اېن) موسسې له استازو سره ولیدل.
 د دې لیدنې موخه د یادې موسسې له لورې د زندانونو چارو د سمون ادارې د پرسونل او زندانيانو لپاره د یو منظم ډېټابېس جوړول او په دې برخه کې د ادارې مربوطه مسوولینو سره د نظرونو تبادله وه، چې دواړو خواوو په دې هکله تر هراړخيز بحث وروسته د يو بل مسووليتونه او اړتياوې تشخيص کړې.
 په ورته وخت کې، د ادارې د مقام د دفتر رئیس محترم عبیدالله "اخلاص" په خپلو خبرو کې د يو منظم ډېټابېس رامنځته کول ډېر اړين ياد کړل او زياته يې کړه، چې په فعالولو سره به يې د ادارې چارې ګړندۍ او شفافې شي.
 بلخوا د(VAN) موسسې استازو هم له خپله اړخه د نوموړي ډېټابېس جوړولو لپاره د هر راز همکاریو ژمنه وکړه.
د زندانونو چارو د سمون اداره تل په دې هڅه کې ده، څو د خپلو او نورو همکارو ملي او نړیوالو بنسټونو په مرسته، د چارو لا ګړنديتوب او روڼتيا لپاره مناسب کاري سیستم جوړ او عملي کړي.

رمضان المبارک ۷/ ۱۴۴۴
د مقام د دفتر رياست
د اطلاعاتو او عامه اړیکو امريت