ولایتي خبرونه(ننګرهار- پکتیا- کندز) د ننګرهار ولایت د ماشومانو د اصلاح او روزنې په مرکز کې رغنېزې چاري پیل شوې
د زندانونو چارو د سمون ادارې د عمومي رئیس محترم مولوي محمدیوسف "مستري" په سپارښتنه او اړتیا ته په کتو سره سم د یاد ولایت د ماشومانو د اصلاح او روزنې په مرکز کې د بیا رغونې چارې چې په کې رنګمالي او د ځینو ویجاړو شویو برخو بیا ترمیم شامل دي، پیل شوې.
همداشان، نوموړي مرکز مسوولین وايي یادې چارې چې لګښت یې د زندانونو چارو د سمون اداره ورکوي په ښه او معیاري توګه به بشپړې او له امله به یې محجوزینو ته لازمې او د پام وړ اسانتیاوې برابرې شي.
د یو بل خبر له مخې، د ننګرهار د زندان مسوولینو د دې ولایت د هسکې مېنې او د شینوارو ولسوالیو له توقیفخونو څخه ليدنه وکړه
د دغه ولایت د زندان مسوولینو د نوموړي ولایت د هسکې مېنې او د شینوارو ولسوالیو له توقیفخونو څخه د لیدنې پرمهال د یادې توقیفخونو له مسوولینو سره په اړوندو مسایلو خبرې اترې وکړې.
داراز، پلاوي د دغو ولسوالیو د توقیفخونو له توقیفیانو سره ولیدل او هغوی هم له مسوولینو څخه د دوی د وضعیت او حال د ارزونې له کبله د مننې تر څنګ خپلې ستونزې او غوښتنې شرېکې کړې چې د مسوولینو له لورې د هغوی دې غوښتنو ته د رسېدنې، د هغوی د حقونو رعایتولو او ورته د لازمو اسانتیاوو د برارولو ژمنه وشوه.
بل لور بیا د پکتیا ولایت له محبس سره د حفظ الصحې توکو مرسته وشوه
د دغه زندان د رهبرۍ په هڅو، او د همکارو بنسټونو له لوري د یاد ولایت له محبس سره د حفظ الصحې بستو مرسته چې په کې د ځان مینځلو صابون، شامپو، د غاښونو کریم، د کالیو مینځلو پوډر، سطلونه او یو شمیر نور توکي شامل وو د یاد زندان د مسوولینو له لورې په پوره شفافیت سره د نوموړي محبس په محبوسینو وويشل شول.
همدا راز، د دغه ولایت د زندان رئيس محترم مولوي سهیل سعید د یادې مرستې په پار د مننې ترڅنګ دغه توکي اړین بللي او له نوموړو یې د ورته نورو مرستو او همکاریو پر دوام ټینګار کړی.
بل خوا بیا، د کندز زندان مسوولینو د دې ولایت د قلعه ذال ولسوالۍ له توقیفخونې ليدنه وکړه
د دغه ولایت د زندان مسوولینو تېره ورځ د نوموړي ولایت د قلعه ذال ولسوالۍ له توقیفخونې څخه د لیدنې پرمهال د یادې توقیفخونې له مسوولینو سره پر اړوندو مسایلو خبرې اترې وکړې.
داراز، پلاوي د دغې ولسوالۍ د توقیفخونې له توقیفیانو سره ولیدل او هغوی هم له نوموړي پلاوي څخه د دوی د وضعیت او حال د ارزونې له کبله د مننې تر څنګ خپلې ستونزې او غوښتنې شرېکې کړې، چې د پلاوي له لورې د هغوی دې غوښتنو ته د رسېدنې، د هغوی د حقونو رعایتولو او ورته د لازمو اسانتیاوو د برابرولو ژمنه وشوه.
صفر المظفر ۲۹/ ۱۴۴۶
د مقام د دفتر ریاست
د اطلاعاتو او عامه اړیکو امریت
