د زندانونو چارو د سمون ادارې او د غزني د عامې روغتیا رياست یوه ګډ پلاوي د دغه ولایت د زندان روغتیايي برخې وارزوله
د زندانونو چارو د سمون ادارې د روغتیا رئیس محترم مولوي عبداللطیف "سجاد" غزني ته د خپل سفر پرمهال تېره ورځ، د دې ولايت د عامې روغتیا رياست د استازي په ملتيا د غزني زندان ته ولاړ او هلته يې د زندان له رئیس مولوي محمد هاشم "حقاني" او نورو مسوولینو سره ولیدل.
په دې ليدنه کې د یاد ولایت د زندان د روغتیايي خدماتو د څرنګوالي، فعاليتونو او ستونزو په اړه خبرې او سلامشورې وشوې.
محترم مولوي سجاد د غزني د زندان د روغتیايي برخې مسوولینو ته ډاډ ورکړ ، چې د دغې ولايت د عامې روغتيا د رياست په همکارۍ به په اړوندې برخه کې شته ستونزې حل او د زندانيانو او پرسونل لپاره د ښو صحي خدمتونو وړاندې کولو په موخه به لازمې اسانتياوې ورته برابرې کړي.
همداشان، محترم مولوي عبداللطیف "سجاد" د غزني ولایت د زندان د روغتیا برخې مسوولینو ته لارښوونه وکړه، څو د بندیانو په درملنه کې هېڅ راز هڅې ونه سپموي.
ذوالقعده- ۴/ ۱۴۴۴
د مقام د دفتر ریاست
د اطلاعاتو او عامه اړیکو امریت
