د زندانونو چارو د سمون ادارې له یو میاشتیني روزنیز او مسلکي کورس څخه په څلورمه دوره کې )۱۳۸) ساتنمنان مجاهدین فارغ شول

د زندانونو چارو د سمون ادارې د ښوونې او روزنې ریاست د تعلیمي مرکز له روزنیز او مسلکي یو میاشتیني کورس څخه د ساتنمنانو په دې څلورمه  دوره کې، هغه(‎۱۳۸) تنه مجاهدین فارغ شول، چې په دې وروستیو کې د ساتنمنۍ بستونو کې په دنده ګومارل شوي دي.
یادو ساتنمنانو، چې د هېواد د ۳۴ ولایتونو له زندانونو څخه په دې کورس کې برخه اخیستې وه، ورته د بندیانو د ساتلو، محکمو او څارنوالیو ته د هغوی د لېږدولو، د بندیانو د بلوا او شورش د کابو کولو، د زندانیانو د انساني او شرعي حقونو رعایتولو او د نظامي نظم او ډېسپلین په پام کې نیولو اړوند لازمې مسلکي زده کړې او روزنې ورکول شوې دي.
د زندانونو چارو د سمون ادارې د نظامي مرستیال محترم پاسوال قاري حبیب الله "بدر" په دې اړه د جوړې شوې غونډې په ترڅ کې، چې د مالي او اداري عمومي رئیس محترم مولوي عبدالهادي مالي "اخندزاده"، د ښوونې او روزنې رئیس محترم مولوي عبدالوارث" سادات"، د یاد زندان د امنیتي قطعې قومندان محترم مولوی شرافت الله" حقاني"، د ښوونیز(تعلیمي) مرکز قومندان محترم ملا حیات الله" احمدي" او یو شمېر نورو ملکي او نظامي پرسونل او مسوولینو هم شتون درلود، د خپلو خبرو پرمهال د زندانونو د امنیت خوندي ساتل ډېر مهم او د امنیتي مسوولینو او پرسونل مسوولیتونه یې تر نورو امنیتي اورګانونو درانه وګڼل او د یاد کورس له فارغانو یې وغوښتل، څو له یوې خوا په کورس کې زده کړي مسایل په خپله په بشپړ ډول عملي کړي او له بلې خوا د زندانونو په امنیتي برخه کې له نورو همکارانو سره یې په پوره امانتوالۍ شریک کړي.
په ورته وخت کې د ادارې د ښوونې او روزنې رئیس محترم مولوي عبدالوارث "سادات" هم په خپله وینا کې، نوموړو فارغانو ساتنمنانو ته په ټینګار سره وویل، « تاسو باید تل په خپلو دندو ټینګ ولاړ او حاضر واوسئ، عبادات مو پر وخت ترسره کړئ او له درسپارل شويو نظامي تجهیزاتو څخه چې د بیت المال دی ښه ساتنه وکړئ».
یاده غونډه، د زندانونو چارو د سمون ادارې د روزنیز کورس د څلورمې دورې (۱۳۸) تنو ګډونوالو ساتنمنانو مجاهدینو ته د فراغت د سند په ورکړې او د خیر د دعا په کولو سره پایته ورسېده.
په پام کې ده، چې د دغې ادارې د ښوونې او روزنې ریاست د ښوونیزې قومندانۍ له خوا به په راتلونکې کې هم، د ساتنمنۍ په بستونو کې نویو ګومارل شویو مجاهدینو ته د یادو کورسونو لړۍ دوام ولري.

جمادي الثاني ۲/ ۱۴۴۳
د اطلاعاتو او عامه اړیکو ریاست