د زندانونو چارو د سمون ادارې نظامي مرستیال د کابل ولایت د ماشومانو د اصلاح او روزنې له مرکزه لیدنه وکړله
د دغې ادارې د نظامي چارو مرستیال محترم لوی پاسوال قاري حبیب الله "بدر" په مشرۍ یوه پلاوي د کابل ولایت د ماشومانو د اصلاح او روزنې مرکز څخه د لیدنې پرمهال د یاد مرکز له رئیس محترم مولوي شرافت الله"حقاني" او پرسونل سره د دې مرکز د محجوزینو لپاره د لاغوره چوپړتیاوو برابرولو او لانورې ښې پاملرنې په اړه خبرې اترې وکړې.
د زندانونو چارو د سمون ادارې نظامي مرستیال د نوموړي مرکز له محجوزینو سره هم له نږدې ولیدل او هغوی یې د اصلاح په موخه د یاد مرکز له لوري د برابرو شویو ګټورو ښوونیزو، روزنیزو، حرفوي او ورزشي برنامو کې ګډون لپاره وهڅول.
داراز، پلاوي د دې مرکز د محجوزینو لپاره د خوړو (اعاشې)، اباتې، پخلنځي او روغتیايي چارو وضعیت له نږدې وارزاوه او د شته نیمګړتیاوو د بشپړولو او د لاښو چوپړتیاوو برابرولو په موخه یې اړوندو مسولینو ته د پام وړ لارښونې وکړې.
په پای کې، پلاوي د دې مرکز له امنیتي ټاورونو، قراولونو او امنیتي پوستو څخه هم لیدنه وکړله او مسوولینو ته یې د یادو ماشومانو لپاره د خوندي چاپېریال د رامنځته کولو په هکله لازمې سپارښتنې وکړې.
ذو القعده ۲/ ۱۴۴۶
د مقام د دفتر ریاست
د اطلاعاتو او عامه اړیکو امریت
