د غزني ولایت د زندان په انګړ کې یو جومات ګټې اخیستنې ته وسپارل شو
دغه جومات د زندانونو چارو د سمون ادارې د عمومي رئیس محترم الحاج مولوي محمدیوسف "مستري" په سپارښتنه چې د دې ادارې په مالي لګښت او د یاد ولایت د والي او خیر خوا وګړو په همکارۍ جوړ شوی د دې ولایت د والي محترم حافظ محمد امین "عمرِي" د نوموړي زندان رئیس محترم قاري عبدالغني "عادل"، د اطلاعاتو او کلتور، دعوت او ارشاد، حج او قافو او د علماوو شورا رئیسانو، د یو شمېر ولسوالیو ولسوالانو او امنیه قوماندانونو په حضور کې د یو لړ ځانګړو مراسمو په ترڅ کې ګټې اخیستنې ته وسپارل شو.
محترم حافظ محمد امین جان "عمري" د دغه جومات په جوړېدو د خوښی په څرګندولو سره د جومات جوړولو چاره یوه عاجله اړتیا وبلله او زیاته یې کړه چې په نړۍ کې د تر ټولو غوره ځایونه جوماتونه دي.
همداشان، د غزني محترم والي په جماعت سره د لمونځ کولو د فضلت په اړه خبرې وکړې او د زندان له مسوولینو، پرسونل او زندانیانو څخه وغوښتل چې پنځه وخته لمونځ په جماعت سره ادا کړي.
همداراز، د غزني محترم والي د یاد زندان د نوي بلاک د جوړولو چارو څخه د لیدنې ترڅنګ د یاد زندان له زندانیانو سره هم وکتل او له مسوولینو څخه یې د هغوی د خوندیتوب او د ژوند غوره اسانتیاوو د برابرولو ترخوا په اداري چارو کې د صادقانه هلوځلو په هدف د ځانګړې مننې ترڅنګ، یاد زندان سره د خپلو همکاریو پر دوام یو ځل بیا ټینګار وکړ.
په ورته وخت کې، د غزني ولایت د زندان د رئیس محترم قاري عبدالغني "عادل" په وینا د نوموړي جومات چارې د زندانونو چارو د سمون ادارې عمومي ریاست په مالي لګښت، د دې ولایت والي او خیر خوا وګړو په همکارۍ په پاخه او اساسي ډول جوړ شوی چې په یو وخت کې د ۳۰۰ تنو لمونځ کوونکو ظرفیت لري.
ربیع الثاني ۱۱/ ۱۴۴۶
د مقام د دفتر ریاست
د اطلاعاتو او عامه اړیکو امریت
