د زندانونو چارو د سمون ادارې او د سره صلیب نړۍوالې کمېټې ترمنځ د همغږۍ ناسته ترسره شوه
د زندانونو چارو د سمون ادارې عمومي رئیس محترم الحاج مولوي محمد یوسف"مستري" په داسې حال کې، چې د دغې ادارې د مقام د دفتر رئیس محترم قاري رحمت الله"ګلزاد"، د اقتصادي برنامو او ستراتیژیکو اړیکو رئیس محترم عبیدالله"اخلاص"، د ازادۍ د سلب پر ځایونو د څارنې رئیس محترم داریوش"مجددي" او یو شمېر نورو مسوولینو هم شتون درلود، په افغانستان کې د سره صلیب نړۍوالې کمېټې له استازي محترم ګریګ مولر په مشرۍ پلاوي سره په کتنه کې د دواړو لوریو پرخپلمنځي همغږۍ زیاتولو، یو له بل سره په کډو همکاریو، تخنیکي مرستو، د زندانیانو د روغتیا پاملرنې، حفظ الصحې، بريښنا، اوسېدو ځایونو، لیدو کتو او د هغوی اعاشې، اباتې او تغذیې په اړه ورسره بحث وکړ.
د زندانونو چارو د سمون ادارې عمومي رئیس محترم الحاج مولوي محمدیوسف "مستري" د یادې کتنې په ترڅ کې خپلو خبرو کې د سره صلیب نړۍوالې کمېټې استازي او ورسره راغلو همکارانو ته د ښه راغلاست سربېره د یادې کمېټې له همکارۍ څخه په مننې زیاته کړله؛ زمونږ هوډ او هڅه دا ده، چې د دیادې ادارې تر چتر لاندې د هیواد په ټولو زندانونو کې د زندانیانو شرعي او انساني حقوقونه خوندي وي.
په ورته وخت کې، د سره صلیب نړۍوالې کمېټې راغلي پلاوي د یادې ادارې کړنې او زندانیانو ته د ښو خدماتو پر وړاندې کولو سره د ستایلو ترڅنګ د نوموړې کمېټې له خوا زندانیانو او زندانونو ته په شفافه توګه د مرستو رسولو او ویشلو لپاره د همغږۍ او زمینې برابرولو په موخه خوښي څرګنده کړله او په راتلونکي کې د چارو د لا ښې همغږۍ او پیاوړتیا لپاره د همکارۍ ډاډ ورکړ.
شعبان المعظم ۲۱/ ۱۴۴۷
د مقام د دفتر ریاست
د اطلاعاتو او عامه اړیکو امریت
